إمعاندين ... إهنا إنعيش

الشاعر رياض النعماني

إنهم ما زالوا حراساً أصلاء لفكرة الحلم , و الوجع الدهري المرير : عدنان منشد , منذر الجبوري , كاظم غيلان, ريسان الخزعلي, يوسف المحمداوي, محمود النمر , مازن لطيف, علي حداد , ستار الناصر , هادي الناصر, حسين حسن .. هذه القصيدة مهداة لهم .

ليل .....

هذا الصبح

و إحنا مساهرين

إمرايه سوده الشمس ,

والعمر الخلص كله خسارات و حنين

وإحنا لسا معاندين

إعلى الخسارة إمراهنين

ترحل الدنيا بمدنها .... بليلها , و جيوشها

و إحنا على الما بقى شي

باقيين

إمعاندين ... إهنا إنعيش

إهنا إنموت

إمعاندين

الأرض هذي.... مو أرض

هذي سماوات ,

و درب

يوصل ألى ( الله )

نمشي ويَّ  الموت ... رَوضناه و صار الموت أحلى

إنموت لعيون النحبهم

للتراب البي ربينا

للوفه ,

و للزاويه ... اليومية

يومية تلمنا

إحنا من هالزاوية إنحارب خراب

أيامنا السوده و ندافع بالحلم , و الكاس

عن  آخر حجر

إحنا كلما طاح و احد ... نكثر

ويكبر كًمر

إحنا من هالزاويه أنحارب دول و جيوش

قذرة

شلنا رايات الحلم , ....و الشوًك

مجَدنا الأغاني

و بالزراك البل أدين

و بالغصون

وبالغبار البلوجوه

إنكول كلشي

ونفضح النواب

و السلطة المزوَره

إنغني و الأغنية يا خويه عراقية و حنينه

و حيل سمره

نهبوا ,

و باكو شوارعنا و ليالينا الحزينة

إتضيك دنيانا..... و نوسعها بسهر

و بدفو

وبحب ّ

 تضوي الطلمة بينا

إنت لو تدري العراق إشلون راح ايكًوم

راح إشلون يدوِي

إتموت دنيانا بيدينا ....

 و إحنا فوگ الفوگ نضوي

على إعناد الباعوا الدنيا بكراسي 

 و على إعناد جيوش قذره

إمساهرين ....

وكوسنا, وإحنا و خسارات العمر و نغني

لأيام الصداقة

وع الخسارة إمراهنين

على هذي الزاوية السمره ,

الحنينه إمراهنين

إعله العراق البيه تتنومس , و تتباهى السنين

إعلى المحبة ,

و زهوة الشعر العراقي

وع العذاب

نرفع (( السياب )) رايه بوجه كل هذا الخراب

إتشيل كل هذي الجيوش

إتشيل كل هذي الأرض

وإحنا نظل إهنا

ويظل هالتراب

 **   **
رياض النعماني