الحزب الشيوعي العراقي

الى محلية الناصرية ( ذخيرة الأولين ) بعد العدوان على مقرها من قبل ميليشات جيش الظلام

كًالوا الفجر ..
كًلت الفجر ذاك البزغ ويَّ الرفاق
الوزّعوا أول مناشيرك

كًالوا الصبح ..
كًلت الصبح , ذاك الطلع ويّ فهد للشغل
يتبسّمّ , على وجهه تعابيرك ..
كًالوا الظهر ..
كًلت الظهر ,اول خليّة أجتمعت أبعكًد الهوى
بالناصرية , وحررّت أول تقاريرك..

كًالوا العصر ..
كًلت العصر ,شاع الخبر كّل العراق
ووّرد الرمان , من الموصل لبغداد للبصرة بتباشيرك ..

كًالوا المسا ..
قلت المسا ,أول مسا بآ ذار مضوي
بيه فوانيس الفلح مضوية
ملتمّين يقرون بمناشيرك ..

يامسية العافية ع الّلي كتب أسمك وعنوانك
وخلاّلك شعار ورسم تصويرك ..

** ** **
رغم العواصف والشتا البارد
وأيام الربيع الميتة ع الأغصان ..!

ورغم المنافي والسجن والموت ,
والدنيا الرديّة , وهجرة الأوطان ..!

ورغم الليالي الموحشة بأحلامنا ,
وحزن الأهل وي قلّة الخّلان ..!

ورغم الزمان السّيء اللّي جعل أنذاله
يحكمون الوطن , ويتبدّل السجّان

ورغم الخديعة اللابسة حكمة الدين
وحولت هذا الوطن , أردأ سجن , , أصعب مكان ..!

ورغم الأفاعي اللّي امتلأ بيها العراق ,
وكثرة الجرذان .. !

ورغم الشماتة من أهل هذا الزمان الردي
واللّي بدّل ألاشتراكية أبمال ألامريكان ..!

واللّي حجز أنسان هذا العصر ,
في قمقم الذلّ , وأطلق الشيطان ..!

رغم كلّ هذي المصايب ,
والمرض, والشيب , والخيبة أبوسط هذا الزمان..!

أنت تبقى لنا بستان العمر ,
وأصغر رفيق البيك يبقى وردة البستان ..

** ** **
منهو الذي خلاّ وجوه الناس
تشرق بالمحبّة ؟؟.. أنت موغيرك ..

منهو الذي خلاّ الوطن أغنية حبّ وشوق
مرسومة على أشفاف الأحبّة ؟؟ .. أنت موغيرك ..

منهو الذي خلاّ الكلام أيصير أبيض كالحقيقة ,
والوهم أسود يخاف أيكون جنبه ؟؟.. أنت موغيرك..

منهو الذي خلاّ الأمل يبقى أمل ,
وتبقى قلوب الناس بالآمال خصبة ؟؟ أنت موغيرك..

أغنى الكتب ذيج القريناها و نقراها ,
كتب مطبوعة بحروف الحقيقة, وبعناوينك وتفكيرك ..

وأحلى الرسوم اللّي يرسمون الوطن بيها
وطن زاهي بأساريرك ..

وأحلى الأغاني تنكتب للناس ,
لمّا أيكون بيها أسمك وتعبيرك ..

وأحلى المجالس تغدي بيها الكلمة موزونة
لأن بيها حضورك .. أنت مو غيرك ..

منّك طلع كلّ اليكتبون الكلام الحلو ,
والشعر الجميل , وأجمل اللوحات مرسومة بتعابيرك ..

يا  أول  الأنهار , ياشوق السواقي , ياحنين الأرض
يابو كلمة الطيبة , ألك ولغيرك ..

أنت الكبير أبين شعبك ,
مهما حاولوا أهل الزمان الردي تصغيرك ..

** ** **

يمكن تطول المحنة , ويظّل الوطن مسلول ,
بيه نشرب الماي الخابط المخلوط بالسل ..!

ويمكن تصير الطائفية محرقة
هذا الزمان الردي وتحرق الكل

ويمكن يصير المرض أصعب من قبل ,
وتكثر الفرقة علينا  والغدر يزداد والذلّ ..!


ويمكن بعضنا يفقد الآمال من كثر النفاق ,
وتطّق روحه ويعتزل ويملّ ..!

ويمكن بعضنا يقول ماعاد الشعب يستاهل ,
وماكو أمل بالكلّ ..!

يمكن , ويمكن ...
وأنت أعرف بالذي يجري بزمان الخيبة والذلّ..!

لكن وجودك يظلّ يبرق بالأمل ,
حتى الوطن يبقى وطن للكلّ ..

نحتاجك , وحاجتنا تشبه حاجة العطشان
في صحرا ويريد الماي والظلّ

** ** **
زهير الدجيلي 2005